Скринингтік зерттеулерден өтуге арналған демалыс

См. статью на русском языке

Әлеуметтік демалыстың бір түрі, бір жыл ішінде 3 жұмыс күнінен аспайтын көлемде жұмыскерге ұсынылатын скринингтік зерттеулерден өтуге арналған демалыс болып табылады. <ҚР ЕК 87 бабының 5 тармағының 5) тармақшасы>

Жұмыс беруші жұмыскерге Қазақстан Республикасының денсаулық сақтау саласындағы заңнамасында айқындалған тәртіппен және көлемде жұмыс орны (лауазымы) мен орташа жалақысын сақтай отырып, скринингтік зерттеулерден өту үшін демалыс беруге міндетті. <ҚР ЕК 23 бабы 2 тармағы 26-1 тармақшасы>

Демалыстың бұл түрі Қазақстан Республикасының Еңбек кодексіне 2020 жылы азаматтардың аурулардың қазіргі заманғы профилактикасына құқықтарын қамтамасыз ету мақсатында Денсаулық сақтау саласындағы заңнамаға түзетулер енгізу шеңберінде енгізілді.

"Халық денсаулығы және денсаулық сақтау жүйесі туралы" ҚР Кодексімен анықталған терминологияға сәйкес, скринингтік зерттеулерге клиникалық симптомдары мен шағымдары жоқ халықты ерте кезеңде түрлі аурулардың өршуін, сондай-ақ олардың пайда болу тәуекелі факторларын анықтау және олардың алдын алу мақсатында медициналық зерттеп қарау кешені түсіндіріледі.

Халық денсаулығы және денсаулық сақтау жүйесі туралы Кодекстің 80 және 87 бабтарына сәйкес Қазақтан Республикасының азаматтары профилактикалық медициналық қарап-тексерулерден, скринингтік зерттеулерден өтуге міндетті.

2020 жылғы 30 қазандағы № ҚР ДСМ-174/2020 ҚР ДС бұйрығына сәйкес скринингтік зерттеулерге жататын адамдардың нысаналы топтарымен жүргізіледі.

Мысалы:

• артериялық гипертонияны, жүректің ишемиялық ауруын, қант диабетін, глаукоманы және мінез-құлықтық қауіп факторларын ерте анықтауға - гипертониямен, жүректің ишемиялық ауруымен, қант диабетімен, глаукомамен динамикалық бақылауда тұрмайтын 30-дан 70 жасқа дейінгі ерлер мен әйелдер;
• жатыр мойны обырын ерте анықтауға - Жатыр мойнының қатерлі ісіктерімен динамикалық бақылауда тұрмайтын 30-дан 70 жасқа дейінгі әйелдер.

Халықты кейіннен динамикалық бақылаумен және сауықтырумен скринингтік зерттеулерді ұйымдастыруды және жүргізуді емханалар қамтамасыз етеді.

Жұмыс берушілер ТМККК және \немесе МӘМС шеңберінде осы тексерулерге жататын адамдарға скринингтік зерттеулерден өту үшін жағдайлар жасайды, сондай-ақ жұмыс орнын (лауазымын) және орташа жалақысын сақтай отырып, жұмыскерлерді жұмыс уақыты кезеңінде олардан өту үшін кедергісіз босатады.